പാലക്കാട് വടക്കഞ്ചേരിയില്‍ വിദ്യാര്‍ഥികളുള്‍പ്പെടെ ഒമ്പതു പേരുടെ മരണത്തിനിടയായ അപകടത്തിനിടയാക്കിയ ബസ് അപകടത്തിന്റെ കാരണഭൂതനായ ടൂറിസ്റ്റ് ബസ് ഡ്രൈവര്‍ ജോമോന്റെ പഴയ വീഡിയോ ദൃശ്യങ്ങള്‍ പുറത്ത്.
അറസ്റ്റിലായ ജോമോന് അപകടകരമായ രീതിയില്‍ ബസ് ഓടിച്ചതിന്റെ വീഡിയോ ദൃശ്യങ്ങളാണ് ഇപ്പോള്‍ പുറത്തു വന്നിരിക്കുന്നത്.
ഡ്രൈവര്‍ സീറ്റിനോട് ചേര്‍ന്ന് എഴുന്നേറ്റ് നിന്ന് ഡാന്‍സ് ചെയ്ത് ബസ് ഓടിക്കുന്നതിന്റെ ദൃശ്യങ്ങളാണ് പുറത്തുവന്നത്.
മറ്റൊരു വിദ്യാര്‍ഥി സംഘത്തോടൊപ്പം വിനോദയാത്രയ്ക്ക് പോയപ്പോള്‍ വിദ്യാര്‍ഥികളില്‍ ചിലര്‍ ചിത്രീകരിച്ച ദൃശ്യങ്ങളാണ് ഇപ്പോള്‍ പുറത്തു വന്നിരിക്കുന്നത്.
വടക്കഞ്ചേരി അപകടത്തില്‍ ജോമോനെതിരെ ഇന്ന് നരഹത്യാകുറ്റം ചുമത്തിയിരുന്നു. ടൂര്‍ ഓപ്പറേറ്ററെന്ന് പറഞ്ഞ് അപകട സ്ഥലത്തുനിന്ന് രക്ഷപെട്ടതും മദ്യപിച്ചിരുന്നോ എന്നതുള്‍പ്പെടെ പരിശോധിക്കുമെന്ന് ഡിവൈഎസ്പി അറിയിച്ചിരുന്നു.
വ്യാഴാഴ്ചയാണ് അപകടം ഉണ്ടായത്. എറണാകുളം മുളന്തുരുത്തി വെട്ടിക്കല്‍ മാര്‍ ബസേലിയോസ് വിദ്യാനികേതന്‍ സ്‌കൂളില്‍ നിന്ന് ഊട്ടിയിലേക്ക് വിനോദയാത്ര പോയ സംഘത്തിന്റെ ബസ് കെഎസ്ആര്‍ടിസി ബസില്‍ ഇടിച്ചുമറിയുകയായിരുന്നു.
അതേസമയം, പാലക്കാട് വടക്കഞ്ചേരിയിലെ അപടകത്തിന് കാരണം ഉറങ്ങിപ്പോയതല്ലെന്ന് ടൂറിസ്റ്റ് ബസ് ഡ്രൈവര്‍ ജോമോന് പറഞ്ഞു.
കെഎസ്ആര്‍ടിസി ബസ് പെട്ടെന്ന് നിര്‍ത്തിയതാണ് അപകടകാരണം. ആളെ ഇറക്കാനാണ് ബസ് നിര്‍ത്തിയതെന്ന് യാത്രക്കാര്‍ പറഞ്ഞു. ബസ് കടന്ന് പോകാന്‍ ഇടം ഉണ്ടായിരുന്നില്ലെന്നും ജോമോന് വ്യക്തമാക്കി.
കെഎസ്ആര്‍ടി ബസ് അപ്രതീക്ഷിതമായി നിര്‍ത്തിയതോടെ ബസിന്റെ നിയന്ത്രണം നഷ്ടമായി പുറകില്‍ പോയി ഇടിക്കുകയായിരുന്നു.
കെഎസ്ആര്‍ടിസി ബസിനെ മറികടന്ന് പോകാന്‍ റോഡിന് വീതിയില്ലായിരുന്നു. കെഎസ്ആര്‍ടിസി ബസുമായി ഇടിച്ചതിന് പിന്നാലെ താന്‍ ഉള്‍പ്പെടെയുള്ളവര്‍ ബസില്‍ നിന്നും പുറത്തേക്ക് തെറിച്ച് വീഴുകയായിരുന്നുവെന്ന് ജോമോന് പറഞ്ഞു.
വടക്കഞ്ചേരി പോലീസും കൊല്ലം ചവറ പോലീസും സംയുക്തമായി നടത്തിയ അന്വേഷണത്തില്‍ ചവറ ശങ്കരമംലത്തു നിന്നാണ് ജോമോനെ പിടികൂടിയത്.
സുഹൃത്തുക്കളോടൊപ്പം കൊല്ലം വഴി തിരുവനന്തപുരത്തെത്തി തമിഴ്നാട്ടിലേക്ക് കടക്കാനായിരുന്നു ശ്രമം. ജോമോനും സുഹൃത്തുക്കളും സഞ്ചരിച്ച കാറിനു കുറുകെ പോലീസ് ജീപ്പിട്ടാണ് പ്രതിയെ പിടികൂടിയത്.
മനപ്പൂര്‍വമല്ലാത്ത നരഹത്യാക്കുറ്റം ചുമത്തിയാണ് ഡ്രൈവര്‍ക്കെതിരെ കേസെടുത്തിരിക്കുന്നത്. ടൂറിസ്റ്റ് ബസുമായി ബന്ധമുള്ളവരില്‍ നിന്ന് ജോമോന് സഹായം ലഭിച്ചുവെന്നു പോലീസിനു വിവരം ലഭിച്ചിട്ടുണ്ട്.
വടക്കഞ്ചേരിയില്‍ ഒമ്പത് പേരുടെ മരണത്തിനിടയാക്കിയ അപകടത്തിന് കാരണമായ ടൂറിസ്റ്റ് ബസിന്റെ സ്പീഡ് ഗവേര്‍ണര്‍ സംവിധാനത്തില്‍ മാറ്റം വരുത്തിയിരുന്നുവെന്ന് കണ്ടെത്തിയതായി ട്രാന്‍സ്പോര്‍ട്ട് കമ്മീഷണര്‍ എസ് ശ്രീജിത്ത് പറഞ്ഞു.
അപകടമുണ്ടാകുമ്പോള്‍ ബസ് അതിവേഗതയിലാണ് സഞ്ചരിച്ചത്. വേഗം കൂട്ടാന്‍ വേണ്ടിയാണ് സ്പീഡ് ഗവേര്‍ണര്‍ സംവിധാനത്തില്‍ മാറ്റം വരുത്തിയത്. കുറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
വീഡിയോ കടപ്പാട് : ടെക് ബൈറ്റ്‌സ് ന്യൂസ്‌
